Çavuşoğlu: “S-400”dən imtina etmirik, “Patriot” da ala bilərik
Türkiyə ABŞ-ın “ZRK Patriot” zenit-raket komplekslərini almağa hazırdır.
“Al-Manar” telekanalının məlumatına əsasən, bu barədə Türkiyənin xarici işlər naziri Mövlud Çavuşoğlu Doha (Qətər) forumunda çıxışı zamanı bildirib.
“Türkiyə ABŞ-ın əvvəlki kimi müttəfiqimiz olmağına inanır və biz də onların müttəfiqiyik. Heç kim “S-400”ün alınması üzrə Rusiya ilə sazişi ləğv edə bilməz, bu saziş artıq baş tutub. Rusiyanın təklifi daha əlverişli idi. İndi biz Amerikanın “Patriot” sistemlərini almağa hazırıq və ABŞ-dan cavab gözləyirik”, - deyə XİN rəhbəri vurğulayıb.
Çavuşoğlu, həmçinin Türkiyənin Rusiyanın S-400 zenit-raket sistemlərini aldığına görə ona qarşı tətbiq edilmiş istənilən sanksiyalara cavab verəcəyi barədə xəbərdarlıq edib.
Xatırladaq ki, dekabrın 9-da Türkiyə prezidenti Rəcəb Tayyip Ərdoğan Rusiyanın “S-400” hava hücumundan müdafiə sistemlərindən imtina etməyəcəyini bəyan etmişdi və əlavə etmişdi ki, Vaşinqtonun əlverişli təklif irəli sürdüyü təqdirdə, “ZRK Patriot” da ala bilər.
