Güləş Federasiyası bu ilə belə yekun vurdu - FOTO
Azərbaycan Güləş Federasiyası (AGF) ilin yekunu ilə bağlı tədbir keçirib.
HerGun.Az xəbər verir ki, mərasimdə AGF rəhbərliyi, federasiyanın əməkdaşları və yığmaların məşqçiləri iştirak edib.
Tədbirdə AGF-nin prezident əvəzi Namiq Əliyev çıxış edib. Bütün güləş ictimaiyyətini Yeni il və 31 dekabr Dünya Azərbaycanlılarının Həmrəylik Günü münasibəti ilə təbrik edən federasiyanın rəhbəri bu fikirləri səsləndirib:
“Bu il Qazaxıstanda keçirilən dünya çempionatında Olimpiadaya iki lisenziya qazandıq. Əlbəttə, bu say bizi qane edə bilməz. 2020-ci ildə daha çox lisenziya qazanmalıyıq. Ümid edirəm ki, Olimpiadada da uğurlu çıxış edəcəyik. Çünki bütün idmansevərlərin əsas medal gözləntisi güləşdəndir. Biz də ümidləri doğrultmalıyıq. Federasiyanın hər bir əməkdaşının qazanılan uğurlarda payı var. Bizim mehriban kollektivimiz var. Biz bir ailə kimiyik.
Bu gün tədbirimizdə Mariya Stadnik də iştirak edir. O, dünya çempionatında əsl xarakter göstərərək qızıl medal qazandı. İnanıram ki, nəhayət, qarşıdan gələn Olimpiadada arzusuna çataraq, fəxri kürsünün ən yüksək pilləsinə qalxacaq”.
Tədbirdə AGF-nin vitse-prezidentləri – Elçin Cəfərov, Firdovsi Umudov, Namiq Abdullayev, idman şöbəsinin müdiri Yaqub Məmmədov, Hakimlər Kollegiyasının sədri Qərib Əliyev və qadınlardan ibarət yığmamızın baş məşqçisi Aslan Ağayev də ürək sözlərini çatdırıb.
Çıxış edənlərin əsas arzusu məhz Olimpiya Oyunlarında güləşçilərimizin uğurlar qazanması və növbəti ildə bu uğurları qeyd etmək olub.
