Müharibədə iştirak etmiş idmançının cəzası azaldıla bilərmi? - AMADA açıqladı

18:20 07-04-2021 28

“Biz dopinq istifadə edən idmançıları cəzalandırarkən yüngülləşdirici halları nəzərə alıb sanksiya tətbiq edirik. İdmançı dopinqdən bilə-bilə istifadə etdiyini qəbul edib, qərarla razılaşırsa, cəza qüvvəyə minir. Onlar bizim qərarla razılaşmadığı halda “İdmanda dopinq vasitələrindən və üsullarından istifadəyə qarşı mübarizə haqqında” Azərbaycan Respublikasının Qanununa əsasən yaradılmış Azərbaycan Milli Antidopinq İntizam Komitəsinə (AMAİK) müraciət edirlər. Bu, beynəlxalq səviyyəli hüquqşünaslardan, həkimlərdən və idmançılardan qurulmuş və tam şəffaf işləyən bir qurumdur. AMAİK-də idmançılar dinlənilir və buna əsasən qərar çıxarılır”.

Bu barədə HerGun.Az-a Azərbaycan Antidopinq Agentliyinin direktoru Şəfəq Hüseynli bildirib.

O, stimulyantlar/metileksanamin tərkibli dopinq maddəsindən istifadə etdiyi üçün iki illik cəzalandırılmış idmançı Kamran Orucovun cəzasının azaldıla bilməsi ilə bağlı danışıb. Müharibədə iştirak etmiş Orucov hazırda Bakı şəhərində kitab satışı ilə məşğuldur.

Şəfəq Hüseynli idmançının cəzasının azaldılması üçün mümkün variantlardan danışıb:  

“Əgər idmançı AMAİK-in qərarından da narazı olarsa, tam yazılı qərarı əldə etdikdən sonra 21 gün ərzində Azərbaycan Milli Antidopinq Apellyasiya Komitəsinə (AMAAK) şikayət verə bilərdi. Bu idmançıda apellyasiya üçün 21 günlük müddət keçib. Amma elə məsələ ola bilər ki, yenidən bu işə baxılması üçün müraciət etmək olar.

Biz bütün sanksiya qərarları qəbul edəndə bu barədə WADA-nı (Ümumdünya Antidopinq Agentliyi) da məlumatlandırırıq. Məcəllədə “idmançı müharibədə iştirak edibsə, onun cəzası azaldılmalıdır” deyə bir cümlə yoxdur. Amma idmançı bizə çox əhəmiyyətli bir məlumat verərsə, “əhəmiyyətli kömək” edərsə, bizim onun cəzasını azaltmaq imkanımız var.

Məsələn, o, başqa bir idmançının dopinqdən istifadə etməsi və ya idmançılara dopinq tərkibli maddələrin verilməsi barədə bizə məlumat verərsə və bu, təsdiqini taparsa, onun məsələsinə yenidən baxıla bilər. Biz onun bu haqda məlumat verməsini məxfi saxlayırıq. Həmçinin, bu barədə WADA-nı yenidən məlumatlandırırıq və sanksiyanı azaldırıq”.

Qeyd edək ki, 2019-cu ilin sonunda keçirilmiş boks üzrə Azərbaycan çempionatında bürünc medal qazansa da, dopinqə düşdüyü üçün medalı əlindən alınmış Kamran Orucov özü də HerGun.Az-a müsahibəsində cəzasının azaldılması üçün AMADA-ya müraciət edəcəyini bildirib.

Səbuhi Musayev