Magistral kəmər zədələndi: Bu rayonlarda qaz olmayacaq
Magistral qaz kəmərinin zədələnməsi ilə əlaqədar Azərbaycanın bəzi rayonlarında qaz təminatında fasilələr yaranacaq.
Bu barədə “Azəriqaz İB” rəsmi “Facebook” səhifəsi ilə xəbərdarlıq edib.
Bildirilib ki, “yanvarın 12-də yol tikintisi ilə məşğul olan podratçı təşkilat tikinti işləri icra edərkən “Qaz İxrac” İdarəsinin balansında olan “Xaldan-Balakən” yüksək təzyiqli magistral qaz kəmərinin Şəki rayonu, Dəhnə kəndindən keçən hissəsini zədələyib:
“Təcili tədbirlər görülərək kəmərdə təzyiq dərhal aşağı endirilib və qaz xəttinin 29-59-cu km-ləri arasında qəzanın ləğv edilməsi məqsədilə saat 15:20-də qaz təchizatı dayandırılıb. Yaxın 1-2 saat ərzində borudan qaz qəbulu davam edəcək, lakin sonradan təzyiq aşağı düşdükcə Şəki, Qax, Zaqatala, Balakən rayonlarının qaz təminatında fasilə yaranacaq. Bütün yerli icra hakimiyyətləri baş verənlər barədə ətraflı məlumatlandırılıb”.
