Vətən müharibəsi şəhidlərinin xatirə lövhəsi açılıb - FOTO

21:00 07-10-2021 23

Xətai rayonunda yerləşən 165 nömrəli orta məktəbin həyətində Vətən müharibəsi şəhidləri Abdürrəhmanlı Sübhan Mahir oğlu, Eyvazov Əbülhəsən Balaş oğlu, Rüstəmov Rövşən Orxan oğlu, aprel şəhidi, pilot mayor Musazadə Təbriz Tariyel oğlu və Birinci Qarabağ müharibəsinin şəhidi Fərrux Abbasovunun xatirə lövhələrinin açılış mərasimi keçirilib.

“Report” xəbər verir ki, tədbirdə Xətai Rayon İcra Hakimiyyətinin nümayəndələri, şəhidlərin ailə üzvləri və ictimaiyyət nümayəndələri iştirak ediblər.

Mərasimdə beş şəhidin qəhrəmanlığından, onların vətənpərvərliyindən söz açılıb. Çıxışlarda Prezident, Müzəffər Ali Baş Komandan İlham Əliyevin rəhbərliyi ilə qazanılan Qələbədə şəhidlərimizin şücaətindən danışılıb, Vətən qarşısında öz borclarını ləyaqətlə yerinə yetirənlərin xatirəsinin xalq tərəfindən daim əziz tutulduğu bildirilib. Daha sonra məktəblilərin ifasında ədəbi-bədii kompozisiyalar nümayiş olunub.

Şəhidlərin ailə üzvləri, müəllimləri, yaxınları çıxış edərək onlarla bağlı xatirələrini bölüşüblər.

Qeyd edək ki, S.Abdurrəhmanlı 1992-ci il oktyabrın 18-də paytaxtın Xətai rayonunda anadan olub. O, Vətən müharibəsinə qatılıb və 2020-ci il oktyabrın 6-da Füzuli istiqamətində döyüş tapşırığının yerinə yetirilməsi zamanı şəhid olub. II Fəxri xiyabanda dəfn edilib. S.Abdurrəhmanlı ölümündən sonra “Vətən uğrunda”, “İgidliyə görə” və “Füzulinin azad olunmasına görə” medallarıı ilə təkltif edilib.

Ə.Eyvazov 1996-cı il noyabrın 1-də Kürdəmir rayonunun Mollakənd kəndində anadan olub. 2020-ci il oktyabrın 28-də Füzuli rayonu ərazisində gedən döyüşlərdə şəhid olub. Oktyabrın 30-da Bakının Suraxanı rayonu ərazisindəki “Dədə Qorqud” qəbiristanlığında dəfn edilib. O, ölümündən sonra “Vətən uğrunda" və "Cəbrayılın azad olunmasına görə" medalları ilə təltif edilib.

R.Rüstəmov 1999-cu il aprelin 11-də Bakı şəhərində anadan olub. 2020-ci il oktyabrın 6-da Tərtər (keçmiş Ağdərə rayonu) istiqamətində gedən döyüşlərdə şəhid olub. Azərbaycan Milli Ordusunun yaradılmasında fəal iştirak etmiş məşhur sərkərdə, general-mayor Tərlan bəy Əliyarbəyovun nəticəsidir. R.Rüstəmov ölümündən sonra “Vətən uğrunda” və “Laçının azad olunmasına görə” medalları ilə təltif edilib.