İlhamə Əbülfət
Bakıda məşhur marketə hücum: Bıçaqla hədələyib pul tələb etdi
20:20 25-01-2020 521
Bakıda 42 yaşlı kişi “Bazarstore” mağazasına bıçaqla basqın edib.
HerGun.Az-ın məlumatına görə, hadisə bu gün saat 18:50 radələrində, paytaxtın Suraxanı rayonu, Malik Mustafayev və Elxan Həsənov küçələrinin kəsişməsində yerləşən ünvanda qeydə alınıb.
Belə ki, 1978-ci il təvəllüdlü Tamin Məmmədov “Bazarstore” mağazasına daxil olaraq satıcını bıçaqla hədələyib, kassadan pul tələb edib. Bu zaman həmin ərazidə olan Suraxanı Rayon Polis İdarəsinin post-patrul xidmətinin əməkdaşlarının çağırış üzrə hadisə yerində çevik tədbirləri nəticəsində T.Məmmədov saxlanılıb.
Daha sonra T.Məmmədov 31-ci Polis Bölməsinə təhvil verilib.
Fakt üzrə araşdırma aparılır.
Qeyd edək ki, son vaxtlar paytaxtda ərazi polis orqanlarının Post Patrul Xidməti (PPX) bölüklərinin fəaliyyəti gücləndirilib. Gün ərzində növbəli xidmət aparan naryadların çağırışlar üzrə hadisə yerinə yaxınlaşması asanlaşdırılıb. Ən müasir rabitə cihazları ilə təmin edilən naryad qruplarına peşəkar əməkdaşlar cəlb olunub. Ərazidə ictimai qaydanın və ictimai təhlükəsizliyin etibarlı təminatının dayanıqlı olması üçün PPX-ların işinin gücləndirilməsi diqqət mərkəzində saxlanılır.
