KOB İnkişaf Mərkəzində sosial media marketinqinə dair təlim keçirilib

00:20 12-03-2020 478

Quba-Xaçmaz iqtisadi rayonunda fəaliyyət göstərən KOB-ların rəqəmsal marketinqdən istifadə etməklə potensial müştəriləri cəlb etməsi, məhsul və ya xidmətləri daha geniş auditoriyaya çatdırması üçün Xaçmaz KOB İnkişaf Mərkəzində sosial media marketinq (SMM) mövzusunda təlim keçirilib.

Kiçik və Orta Biznesin İnkişafı Agentliyindən HerGun.Az-a bildirilib ki, təlimdə iştirakçılar sosial şəbəkələr və onların effektiv idarə olunması, biznesin inkişafında SMM-dən istifadə barədə məlumatlandırılıb. Real nümunələr əsasında rəqəmsal marketinqin üstünlüklərinin nümayiş olunduğu təlimdə KOB subyektlərinə sosial şəbəkələrdə biznes fəaliyyəti üçün şəxsi hesablarının yaradılmasına dəstək göstərilib.

Xaçmaz KOB İnkişaf Mərkəzində, həmçinin “Sosial layihələr, dövlət proqramları ilə iş” mövzusunda da təlim keçirilib. İki gün davam edən təlimdə iştirakçılar layihələrin yazılması və idarə edilməsi, layihələr üçün maliyyə mənbələrinin araşdırılması, layihələrin hesabatlılığı barədə ətraflı məlumatlandırılıb, onları maraqlandıran suallar cavablandırılıb.