“Qarabağ”ın prezidenti: “Biz texniki qələbə istəmirik”

17:20 09-09-2020 1163

UEFA Çempionlar Liqasının III təsnifat mərhələsində “Qarabağ” Bakıda Norveç təmsilçisi “Molde”ni qəbul etməli olsa da, qarşı tərəf COVID-19 pandemiyasını bəhanə gətirərək Azərbaycana gəlməkdən boyun qaçırır. 

“Molde”nin ölkəyə qayıtdığı zaman Norveçin müvafiq qurumları tərəfindən 10 gün karantində saxlama vəziyyətini əsas gətirərək ölkəmizə gəlməkdən çəkinməsi oyunun təyinatıyla bağlı yubanma yaradıb.

“Qarabağ”ın prezidenti Tahir Gözəl baş verən hadisəni klubun rəsmi saytına dəyərləndirib:

“Hazırda yaranmış vəziyyət həqiqətən çox üzücüdür. Norveç tərəfinin bəlli ədalətsizliyi bizi həqiqətən məyus edir. Bu məsələdə “Qarabağ” tərəfi sonuna qədər haqlı olsa da, UEFA Norveç tərəfinin haqsız inadkarlığı nəticəsində oyunun neytral meydançada keçirilməsinə yönəlib. 

Biz hər zaman ədalətli oyunun tərəfdarı olmuşuq. Əgər püşk bizi Norveçdə oynamağa göndərsəydi, məmnuniyyətlə bunu edərdik. Amma görünən odur ki, qarşı tərəf fərqli bəhanələrlə Azərbaycana gəlməkdən qaçaraq neytral meydanda oynamaq istəyir. Biz nə texniki məğlubiyyət, nə də texniki qələbə istəyirik.

AFFA rəhbərliyi ilə müzakirələrimiz nəticəsində qarşılaşmanın üçüncü ölkədə keçirilməsi haqqında qərar verilsə, razılıq verəcəyik. Buna səbəb bizim futbolu bir idman kimi, bu oyunun masa arxasında deyil, yaşıl meydanda olan bir oyun kimi görməyimizdir. Mən komandama inanıram. Və bu qarşılaşmanın yaşıl meydanda qazanılmasını arzulayıram. Qərar nə olursa olsun, komandamın yanındayam və sona qədər dəstəyimi əsirgəməyəcəyəm”.

Qeyd edək ki, bu matç sentyabrın 16-sı və ya 17-sində keçirilməlidir.