1990-cı illərin ən məşhur siması, "Vəhşi mələk" serialındakı Milaqres obrazından tamaşaçılara yaxşı tanış olan əslən uruqvaylı aktrisa və müğənni Nataliya Oreyro 17 il sonra gözlənilməz sürprizlə qarşılaşıb.

HerGun.Az xəbər verir ki, Penza vilayətinin Saltıkovo kəndindən olan 12 yaşlı Olya çox sevdiyi və fanatı olduğu Nataliyaya qeyri-adi  məktub ünvanlayıb. O, ürək sözlərini bir vərəqə yazaraq, onu şüşə qaba yerləşdirib və suya buraxıb. O vaxtdan 17 il ötüb. Qızın ağlının ucundan da keçməzdi ki, uşaqlıqda pərəstiş etdiyi müğənni ona illər sonra cavab verəcək. Ancaq bu yaxınlarda əsl möcüzə baş verib.

İçində məktub olan şüşə qabı qonşu kəndin sakini Yevgeniya Serdobska balıq tutduğu zaman qamışlıqda aşkar edib. Məlum olub ki, şüşə qab 12 kilometr məsafəni qət edib, sonra qamışlığa düşüb. Şüşənin içindəki məktubu görən Yevgeniya onu açıb oxumaq qərarına gəlir. Nataliyanı səmimi qəlbdən yazdığı sətirləri oxuyan Yevgeniya o qədər heyrətlənir ki, bu hekayəni bütün mediaya danışır. Bir sözlə bu hekayə ictimailəşərək, sərhədləri aşır.
 
Nəticədə əhvalat Nataliya Oreyronun qulağına çatır. Aktrisa onu sevən rus fanatına videomesaj yollamaq qərarına gəlir. 

“Özünüz ol və lütfən, müğənniliyini dayandırmayın!  Bəlkə də, bir gün birlikdə oxuduq!" - deyə Nataliya fanatı olan Olyaya səslənib.

Rəşad Əliyev