Bakıda kişi ərə getmək istəyən keçmiş arvadını yandırmağa çalışdı
Sabunçu rayonu Maştağa qəsəbəsinin sakinini keçmiş həyat yoldaşı yandırmaq istəyib.
Bu barədə HerGun.Az-a Sabunçu Rayon Polis İdarəsindən məlumat verilib.
Bildirilib ki, 1986-cı il təvəllüdlü Məmmədzadə Aynur Rasim qızının evində sentyabrın 15-də, saat 18:30 radələrində 1981-ci il təvəllüdlü keçmiş həyat yoldaşı Əhmədli Rasim İkram oğlu peyda olub.
Keçmiş həyat yoldaşları arasında münaqişə yaşanıb və bu müddət ərzində kişi qadının üzərinə benzin tökərək onu yandırmağa çalışıb. Bu zaman onların qızı polisə zəng edərək, məlumat verib. Rasim Əhmədli cinayət yerindən qaçmağa çalışsa da, 14-cü Polis Bölməsinin əməliyyatçıları onu istintaqdan yayınmadan saxlayıblar.
İlkin dindirmə zamanı saxlanılan şəxs münaqişənin keçmiş həyat yoldaşının səhv davranışları səbəbindən yarandığını bildirib. Belə ki, R.Əhmədli iki qız anası olan A.Məmmədzadənin evə kənar adam gətirməsini qəbul edə bilməyib.
R.Əhmədli keçmiş həyat yoldaşının ona həyatını bundan sonra başqa biri ilə birləşdirmək istədiyini və buna görə onların evinə gəlməməsi ilə bağlı məlumat verdiyi mesajı göstərib.
Bunun ardından keçmiş ər qızlarının olduğu evə başqa bir kişinin gəlməsinə qəti şəkildə qarşı çıxaraq qızları ona verməyi tələb edib. Lakin qadın bu tələblə razılaşmayıb. Nəticədə, R.Əhmədli benzin götürərək, keçmiş həyat yoldaşının evinə gedib.
Hazırda sui-qəsd cəhdi ilə bağlı cinayət işi başlanılıb. İstintaq davam edir.
Ramella İbrahimxəlilova
