Qəbul imtahanlarında eyni bal toplayan bacılar: “Bir universitetdə oxumaq istərdik”

15:00 11-09-2020 391

Bu il ali məktəbə imtahan verən iki bacı gündəmi zəbt edib. Məsələnin maraqlı tərəfi bacıların əkiz olduğu və hər ikisinin qəbul imtahanlarından eyni bal toplaması ilə bağlı iddialardır.

Əkiz olduqlarını iddia etdiyi bacılardan biri – 2003-cü il təvəllüdlü Nuranə Əhmədova və 2004-cü il təvəllüdlü Aynurə Əhmədovadır. 

HerGun.Az-ın əməkdaşı ali məktəbə qəbul imtahanlarından eyni bal toplayan bacılarla həmsöhbət olub.

Birinci ixtisas qrupu üzrə imtahan verən Nuranə Əhmədova deyir ki, bacısı ilə eyni məktəbə gedib:

“Kürdəmir rayonu Şilyan kənd orta məktəbində bitirmişik. Nənəm fizika müəlliməsi olduğu üçün dərslərimizə köməklik göstərirdi. Orta məktəbi yaxşı qiymətlərlə bitirmişik. Pedaqoji Universitetin “Riyaziyyat və informatika” fakültəsini seçmək istərdim”.

Aynurə Əhmədova isə ikinci ixtisas qrupu üzrə imtahan verib. Onun arzusu isə tarix-coğrafiya müəllimi olmaqdır:

“Bacımla eyni orta məktəbdə təhsil almışıq. İstəyirik ki, eyni ali təhsil müəssisəsində də təhsilimizi davam etdirək. Seçimim Azərbaycan Dövlət Pedaqoji Universiteti olacaq”.

Bacılar deyir ki, onlar əkiz deyillər:

“Bu barədə kim yazıb bilmirik, amma biz əkiz deyilik. Aramızda bir yaş fərq var. Şəkillərə də baxsaz görərsiz ki, qətiyyən bənzəmirik”.