Rusiyada terrorçular zərərsizləşdirildi

16:45 14-03-2019 14

Rusiyanın Federal Təhlükəsizlik Xidməti Stavropol diyarının Şpakovsk rayonunda terror aktları törətməyi planlaşdıran şəxsləri zərərsizləşdirib.

Bu barədə “RİA Novosti” Milli Terrorla Mübarizə Komitəsinə (Rusiya) istinadən məlumat yayıb.

Martın 14-də FTX-yə Balki kəndi yaxınlığından bir qrup quldurun avtomobillə ötüb keçəcəyi ilə bağlı məlumat daxil olub.

“Hüquq-mühafizə orqanları əməkdaşları şübhəli avtomobili saxlamağa çalışan zaman içəridə olan şəxslər avtomat silahlardan atəş açıb, əl qumabarasından istifadə edib və ərazidən uzaqlaşmağa çalışıb”, - deyə Milli Terrorla Mübarizə Komitəsinin məlumatında deyilir.

Baş verən atışmada hər iki yaraqlı zərərsizləşdirilib. Operativ qərargahın məlumatına görə, onlar Volqoqrad vilayətində doğulub boya-başa çatıblar və Stavropol diyarına terror hücumları həyata keçirmək məqsədilə gəliblər.

“Onların İŞİD terrorçu qruplaşmasının tərəfdarları olduğu müəyyən edilib. Hadisə yerində silah-sursat və əl qumbarası aşkarlanıb”, - deyə komitənin məlumatında qeyd olunur.