"Atlas Klinikası"nın lisenziyası ləğv edilir?

14:41 29-07-2019 30

Son illər ölkədə xüsusən də paytaxt Bakı şəhərində özəl tibb klinikalarının sayı artmaqdadır.

Əksəriyyəti yüksək mənsəbli məmurlara, oliqarxlara aid olan bu tibb müəssisələri ilk vaxtlar insanlarda sevinc hissi doğururdu. Düşünülürdü ki, İrana, Rusiyaya, Avropaya xəstəliklərinin çarəsi üçün üz tutan vətəndaşlarımız daha öz vətənlərində yüksək keyfiyyətli müalicə alacaqlar. Bu həm də hər il xaricə axıdılan milyonlarla vəsaitin ölkədə qalacağına əsas olmalı idi.

Ancaq çox təəssüf ki, özəl klinikalar ümidləri doğrultmadı. Yenə də hər il minlərlə insanlarımız Azərbaycan səhiyyəsinə etibar etməyərək xaricə üz tuturlar.

HerGun.az Qlobal.az-a istinadən xəbər verir ki, buna səbəb isə özəl klinikalarda qiymətlərin çox baha olması və savadlı tibbi personalın yoxluğudur. Zamanla ölkə mediasının da tez tez işıqlandırdığı bu problemin həlli isə görünür hələ çox vaxt aparacaq.

Azərbaycanda fəaliyyət göstərən özəl klinikaların əksəriyyətində qiymətlər od tutub yanır. Qiymətlərin baha olmasını klinikalar tibbi idmətin yüksək olması ilə əlaqələndirirlər. Ancaq bəzi klinikalar da var ki, əlləri hər yerdən üzülən insanları aldadıb tora salmaqla məşğuldurlar. Ucuz qiymətlərə çoxsaylı müayinə vəd edib insanları son qəpiyinə kimi soyan özəl tibb müəssisələrində biri də "Atlas klinikası"dır.

Öncə qeyd edək ki, klinika yol verdiyi qanunsuzluqlara görə 2014-cü ildə fəaliyyətini dayandımağa məcbur qalmışdı. Səhiyyə nazirliyinin verdiyi məlumatlarda klinikanın bağlanması səbəbi kimi bildirilirdi ki, klinika təkcə lisenziya əlavəsində göstərilən xidmətlərdən kənar-ginekoloji və doğuşayardım xidmətləri göstərməyib, həm də ümumilikdə fəaliyyətində nöqsanlar olub. Bu nöqsanları isə saymaqla qurtarmaq mümkün deyil. Klinikada rüşvətxorluq, korrupsiya, vergidən yayınma pik həddə olub. Bu barədə zamanında mediada kifayət qədər melumatlar verilib.

"Atlas klinikası"ı həm də insanların yaddaşında "39 manatlıq Chek-up müayinəsi"nin reklamı ilə qalıb. Belə ki, bir müddət əvvəl insanların mobil telefonlarına zəng edərək onların nömrələrinin "qalib" olduğunu deyən klinikanın operatorları 39 manata Chek-up müayinəsi təklif edirdilər.

"Atlas klinikası"nın bu "şirin" təklifinə aldanıb klinikaya gedən insanların xərci isə 250-300 manata başa gəlirdi. Bu barədə bir müddət öncə sosial şəbəkələrdə şikayətçi olan Mübariz Həsənov adlı şəxs qeyd edirdi:

"Check-Up” üçün xəstəxanaya pul ödəndikdən sonra həkimlərin otaqlarına yönləndirirlər. Klinikada xəstələri bu qiymətə inandırsalar da, 150-200 AZN arası xərcləri çıxır. Çünki xəstənin ödədiyi paketə daxil olmayan xidmətlər təklif olunur və müxtəlif həkimlərin yanına göndərilər. Belə olan halda xəstənin ödədiyi məbləğ 300-400 AZN-ə qədər gəlib çıxır”.

"Atlas klinikası"ının "Chek-up" dələduzluğu ifşa edildikdən sonra klinika daha insanları sms və ya zəngləri ilə narahat etmir.

Məlumata görə peşəkar tibbi personal heyətinə və müasir tibbi avadanlıqlara malik olmayan "Atlas klinikası"ının lisenziyası yenidən ləğv edilə bilər.

Qarşı tərəf mövqe bildirə bilər.